क्या राम्री गोकुल्या मेला, जिलेबिका फेरा
उन दिन चक्कर लाउथ्या, एयरपोर्टका सेरा ।
सौकाका उनिका कम्बल,जुमलिका घोडा
थाक्याको मसुस झुक्दो,खुट्टा हुन्थ्या फोडा ।
चर्का घुम्दो फिरिफिरि मन घुम्दो फनफनी
उन दिन हराउन लाग्या,दिनबार गनिगनी ।
हप्ता दुइ पहिल्यै आउथ्या,मधुरासका देशी
आलोपालो मिलाइ घरका, सबै झर्थ्या बेशी ।
मार्मालिका सुप्पा माेट्टा, रित्तिदा चार दिनमा
कत्तेइत घोचपेच लाग्दो,भिडको छिनछिनमा ।
मेला भनि लोभलाभमा, पैसा जोगाइ राख्थ्या
मेलाको चिनानो भनि, चिनो लगाइ राख्थ्या ।
सानैनका पारा बेन्ना, स्वच्छ तामका ताउला
गैग्यो प्रथा गैग्यो चलन, उन दिन नआउला ।
यै महिनाका ६ बठे चल्या पुण्य भुमि गोकुलेश्वर शिवरात्री मेलाको सब्बैकि निम्तो छ !!
विष्णु जोशी “अँठाेला”
शैल्यशिखर न. पा ०७ दार्चुला
उनी हाल शैल्यशिखर नगरपालिकामा सहायक चौथो पदमा कार्यरत छन् ।
